الأنوثه مش سهله

يا جماعه النهارده صديقنا حسام هيحكيلنا حاجه
أنا حسام أنا راجل
والحضور بيهتف رااااااجل يا حسام !!!
وبيحكيلنا حسام : الاسبوع اللى فات واحد صاحبنى ورطنا فى خناقه بعد السهره
وكانوا كتير
فجريت منهم يا جماعه
جريت

وبيتكلم خبير الرجوله وبينصح صديقنا حسام : صديقى حسام
محدش فينا يحب يدخل خناقه خسرانه
بس الخلعان له اصول
مره تانيه لو وقعت فى نفس المشكله دى تلف على طول وتضرب صاحبك كإنك بتربيه
ساعتها هم هيهدوا
صاحبك هيضرب اقل
وانت مش هتضرب خالص

لاحظت طبعا جزء من حياة الرجل كان غايب عنى وهو انو عشان يكون رجل مكتمل الرجوله شئ مش سهل خالص زى ما بيقول الاعلان فى الحمله اللى كان شعارها
استرجل واشرب بيريل
قدمت الحمله الحل الامثل لاكتمال رجولة الرجل.. على سبيل المثال
لو شعرك وحش شيله
الازازه تتحط فى اى حته
اللى يخليك تعيط الكوره بس
شخصية البنت آخر حاجه تعلق عليها
طبعا انا بشكر شركة بيريل لانها اظهرت جانب من حياة الرجل او بعض الرجال يعنى مش من صفات الرجوله ومحدش اخد باله

الرجوله مش سهله فعلا لدرجة ان الرجاله بتسال ومش عارفه هى الستات دول بيشتكوا من ايه ؟؟!!

الراجل لازم يبقى عاقل ويستحمل اى حاجه وفـ نفس الوقت لازم يتجنن ويسخن على اى خناقه
الراجل لازم يقدر ويحب مراته وفى نفس الوقت مينفعش يبان لحد انه بيقدر او بيحب مراته
الراجل لازم يقول الحق تحت اى ظرف وتحت اى ظرف الراجل مينفعش يفتن
الراجل لو مش عارف حاجه لازم يقول معرفش وفـ نفس الوقت لو تاه وهو سايق مينفعش يسأل

هى فعلا معادله صعبه شويه
لا شويه ايه شويه كتير يعنى متزعلش.. فعلا ما أصعب ان يكون الرجل رجلا !

المهم يا سيدى الرجل بعد تمعن والفضل يعود لشركه بيربل طبعا اكتشفت انو الكلام مرتب بطريقه قصديه لتضئ جوانب من الازمه التى يعيشها الرجل.. ولذلك الحملة تساعدك وتشد من ازرك.. اشرب بيريل وادعى ربنا يتم رجولتك.. ربنا قادر وكريم ..

على صعيد اخر لازم اصرح واعترف انو انا كمان مش انثى  كاملة.. لست كالجوارى فى قصور الملوك ولست كعارضات الازياء.. لست كسندريلا والاميرة الحسناء.. اوعى تتفلسف لست ايضا الشاطر حسن..

الانوثة مش سهله ..
انك تكونى ناعمه زى الحرير وتطيرى زى العصافير وارق من النسمه والطف من النغمه.. دى حاجه تحسدى عليها..

وغالبا صوتك الخافت سيعلوا مع الايام واظافرك ستنكسر وشعرك يتعب او يبقى لونه ابيض واحساسك العالى بالاخرين وبكاءك للاطفال والمحتاجين وكل اغنية حزينه وكل بطلة فى كل فليم وأغنيه وكل صديقه فـ ازمه وكل خبرعن فلسطين.. الخ.. ستنفذ دموعك وتصبح اعز من ذلك ..

الانوثة يا ايها الرجل ليست بالامر السهل.. خاصة انها تواجه بمعترك حياة عملية صنعها الرجل لتناسبه وحده وتفاجأ هو والمرأة انها اصبحت فى نفس البيئة القاسية.. تركب نفس وسائل التنقل وتجلس فى نفس المكاتب وتتعرض لنفس الضغوط.. الضغوط التى تجعلك تسترجل اكثر وتفقدها انوثتها..
الانوثة صعبة عندما تجد ان الرجل ليس مسترجل كفاية فتضع بعض من الرجولة عليها لتعيل الاسرة وتحمى الاطفال وتجابه المشاكل ..

الانوثة صعبة خاصة انها تواجه بمن يخبرها انها قنبلة موقوته.. لمى نفسك احسن تنفجرى!
احسن حاجة اتخلصى من انوثتك كونى ساده بلا عطور ولا مستحضرات تجميل ولا اى حاجة..

طيب ممكن لو سمحتى كمان تكونى شاحبة وحزينة ومنكسرة.. وامشى بسرعة البرق او الصاروخ مفيش مشكله المهم انك لا تلفتى النظر لمشيتك.. ساعدينا على غض النظر فكونى غير مرئية !

وفى ختام مرافعتى سيدى الرجل اطالب بمشروب انوثة تماما كبريل ..