لنلتق على صفحات التاريخ .!

عايزه اوضح حاجه ملهاش علاقه بالفنانين بس
اى حد
ايا كان
فنان او صحفى او سياسى او اعلامى او رجل دين او اى شخصيه عاديه وبسيطه
المناقشه المنطقيه مفيهاش اى مشكله

لكن

المنافق الحقيقى اللى كان مع النظام لغاية ما حس ان الثوره نجحت والنظام سقط فغير موقفه من النظام وحب يعمل انو مع الثوره وانو كان مع الشعب اللى طالب باسقاطه

ودول ناس كتير معروفين مفيش داعى لذكر اسماء دلوقتى

عشان كدا وبالرغم من غضبى الشديد من انس الفقى وزير الاعلام الا ان الراجل كان واضح وصريح فى اعترافه انو مكنش ممكن يقدم اعلام زى اللى ظهر فى القنوات الفضائيه التانيه ومنها الجزيره والبى بى سى والعربيه لانو كان مع النظام وبما ان النظام سقط وهو كان معاه فعلشان كده قدم استقالته

الراجل ده اعترف انو كان قاصد يظهر اعلام مغاير للواقع بحكم كونه مع النظام (والله اعلم هو اللى قدم استقالته ولا رئيس الوزراء احمد شفيق اللى طلب منه كده)

لكن الناس اللى بتحاول تقول انها مكنتش فاهمه وانو اتضحك عليها فده لانها مش عايزه تخسر جمهورها وخصوصا بعد ما حس انو خلاص حقق اللى كان بينادى بيه

يمكن فى الاول كانوا موهومين ان الناس اللى فى الميدان قله ودا اللى اوهمهم بيه النظام والاعلام الفاسد وبعد ما اكتشفوا انهم فعلا الاغلبيه وانهم بيعبروا عن اراء ومواقف الناس اللى فى البيوت واللى ماسعدهاش الحظ انها تشارك يعنى بمثابة الشعب كله بدأوا يتراجعوا ويغيروا كلامهم

قناة المحور بقى كانت من القنوات اللى استغربتها جدا
بعد تنحى مبارك وفى نفس اليوم كانوا بيذيعوا لقطات من البرنامج وكاتبين (حصاد برنامج 48 ساعه طوال ايام الثوره) ومركزين على اجزاء لا بتوضح انها مع او ضد زى ما يكونوا عملوا سبق صحفى او شاركوا فى نجاح الثوره مع انهم افقدوا قناة المحور مصداقيتها تماما
حاجه غريبه بجد
لو الانسان بيخجل من اراؤه وافكاره ليه متمسك بيها بقى
ازاى يبقى اعلامى ومفروض انه يكون حد صريح جدا علشان ميفقدش الناس مصداقيته هو والقناه اللى بيتكلم من خلالها ومش قادر يعبر عن اتجاهاته بصراحه
هناء السمرى وسيد على بالذات معروفين من زمان بتأييدهم للنظام وبما انهم ولا اى حد كان يتوقع انو يسقط بعد 18 يوم فقط فده خلاهم عايزين يمسكو العصايه من النص وبوظوا الدنيا بالبرنامج ده
بالذات الحلقه الملفقه اللى جابوا فيها بنت بتعترف انها جايه من امريكا واتدربت على ايدين يهود وبتتكلم فى ارقام مهوله الشباب بيقضبها مقابل قلب نظام الحكم فى مصر
كلام ميدخلش عقل طفل فى كى جى تو يعنى
عمليات ارهابيه كتير حصلت فى تاريخ مصر وفى الدنيا كلها مفيش مره اتعرفت جهتها
او على الاقل محصلش ان الجانى ظهر فى اى وسيله اعلاميه واتكلم عن كل مخططاتها
طب البنت دى فين دلوقتى ؟
وعموا معاها ايه ؟
دا غير ان تشويش صورتها ملوش اى مبرر !
اى مجرم بيتقبض عليه بيظهر بوشه للناس كلها لانه مجرم حقيقى
حتى اللى لسه متحاكمش وبيتحقق معاه لما بيظهر بيظهر بوشه
فى الحقيقه هى اتشوش على صورتها لان الموضوع كله ملفق بس هى قابضه فعلا
بس مش من جهه يهوديه
للاسف انها قبضت من قناة المحور علشان تطلع تقوم بالدور اللى مثلته وفشلت فيه هى والمذيعين بتوعها
استغربت اوى وهى بتقولها قولى الحقيقه اتقى الله يا شيماء !!!!! كنت بقولها فى عقلى اتقى الله انتى يا هناء !!!
كل ده علشان يقلبوا الناس على الموجودين فى الميدان ويصدقوا انها خيانه من برا البلد ومش حركه شعبيه بجد لكن من بعد نجاح الثوره فى اسقاط النظام بيقدموا التحيه لشباب ميدان التحرير دلوقتى !!!!!
الخطه من البدايه هى ان الناس اللى مشاركتش فى المظاهرات من البدايه واتفاجئت بيها تتقلب على الشباب ده وتفتكر انه السبب فى الفوضى اللى حصلت (واللى اصلا كانت من جانب النظام) علشان ميتحدوش مع الشباب وتتقلب لثوره ويسقطوا النظام
لكن الناس اخيرا فهمت واتحدوا مع شباب المظاهرات واتحولت لثورة شعبيه نجحت فى النهايه
بس الناس دى هتتحاسب على التلفيق ده بجد
للاسف مش بس النظام اللى كان فاسد
جهات ومؤسسات كتير فيها فساد
الدنيا كلها محتاجه تراجع نفسها وتحكم ضميرها بجد
وكل واحد ميستغلش موقعه للشهره ومصالحه الشخصيه وبس
ياريت كل الناس تحاول تبقى نزيهه شويه
اعلاميين ومواطنين عاديين
ياريت بجد نتغير بقى
عشان زهقنا من الاستخفاف بالعقول
بالنسبه للحديث (ستاتى على أمتى سنوات خداعات يكذب فيها الصادق ويصدق فيها الكاذب ويؤتمن الخائن ويخون فيها الامين وينطق فيها الرويبضه) قيل (وما الرويبضه) قال (ص): (الرجل التافه السفيه يتكلم فى أمر العامة) الحديث ده ينطبق على اللى ( كان ) حاصل

فهو ينطبق على الاشاعات الكاذبه والاعلام الفاسد اللى بدل الحقايق وغيرها لصالح النظام وللاسف انو كان موجه للناس اللى مش فاهمه وصدقته
ع الرغم من ان المخطط اللى اتعمل لقمع المظاهرات وابعاد الناس عن الوعى والفهم الحقيقى للموقف معروف من زمان وبيعيد نفسه على مدار صفحات طويله من التاريخ
لكن الحقيقه دايما هى اللى بتظهر فى النهايه

وبعدين اللعبه باينه من اولها
الخراب الريس هو اللى عمله
زى قرصة ودن للناس اللى بتطالب بحقوقها
متنسوش انو قالها فى خطابه التانى (إما انا او الفوضى)
يعنى هسلبكو حقوق اكتر واكتر كمان لو مرجعتوش وبطلتوا تطالبو بحقوقكم
مش كفايه عليكو معيشكو فى امان وهمى ؟!
وهو الامان اصلا منه ولا هبه من عندك ؟!
ده حق الشعب عليك اللى هتتحاسب وتتسال عليه فيوم
وبعدين مش هو دا الامان اللى اخدته برضه فى لحظه ؟
يعنى خلاص مبقاش ليك امان
ده غير ان فعلا الامان مش موجود
احنا عايشين فى قانون طوارئ من ايام جدى 
تتشد وانت ماشى فى الشارع هو ده الأمان ؟
تروح مكان متعرفش فين هو هو ده الأمان ؟
يدخل عليك وانت نايم كده ظابط امور وياخدك ؟
هو ده الأمان ؟
احنا بنضحك على نفسنا
هى اسرائيل هتحاربنا ليه
معابر وبتتفتح غاز وبيتصدر باقل من السعر العالمى ناس وبتتقتل على الحدود وبنقول ربنا يسامحهم 
هتحاربنا ليه اذا كان هما مستفيدين !

انت اديت للناس احساس مزيف بالامان مقابل سكوتهم
يعنى الناس دى لو مدفعتش التمن مش هتحس بالامان زى الناس اللى فعلا مش حاسين بيه اصلا
دلوقتى عايزين الامان ده لكل الناس
وبدون مقابل
عشان ده حق
ولو هتهددنا بالفوضى والخراب احنا كمان
فالمساواه فى الظلم عدل
ومش هنسكت لغاية ما نحقق الامان والعدل الحقيقيين لكل الشعب مش فئات معينه

وبعدين بجد انا بستغرب لما بلاقى حد يتحمق علشان حد تانى بيغلط فى الريس
اى منطق يمنع الناس دى انها تنفس عن اللى جواها تجاه شخص واحد اهان شعب بأكمله
الريس مش احسن من الناس اللى كانت بتدخل المعتقلات وتتعذب وتتهان وتتشتم وتتقطع وتتبهدل وفيهم ناس بتتاخد غلطه وناس بتموت وبأمر منه
اى منطق يقول ان الراجل ده مش مفروض يتشتم
الراجل ده مش إلاه والسن مش هيشفعله على فكره
ومفيش فرق بين البشر الا بالتقوى والعمل الصالح
الراجل ده متقاش ربنا فى شعبه
متقاش ربنا فى نفسه
لا هو فعلا ميستحقش الشتيمه
اصل الشتيمه مبتلزقش وعشان كدا الريس كان عامل مش اخد باله وبيمارس سلطته استهزاءا منه بالشعب
الراجل ده يستحق ما هو اكبر بكثير من مجرد لفظه او شتمه تتوجهله او تتقال عليه
اولا الريس مش بيمثل الشعب المصرى
مبارك مش مصر
ومصر مش مبارك
الريس بيمثل نفسه
اللى كل الشعوب عارفاها ومن قبلنا ورغم اننا عارفينها الا اننا اتكلمنا متأخر اوى
الريس ده هو السبب فى كراهية الشعوب العربيه لينا
والدليل ان فى كل دوله عربيه عملوا مظاهرات ادام السفاره المصريه بيطالبوا فيها بالرحيل
كل الشعوب العربيه كانت متضامنه معانا وبتأيدنا وبتدعى لثورتنا بالنجاح
يعنى لو كانت وقفت قبل التنحى انا فعلا متخيله رد فعل الناس كان هيبقى عامل ازاى ناهيك عن رد فعل الرئيس نفسه !
وطبعا كان هيرجع المصرى ارخص مما كان قبل الثوره دى
يعنى يا تتعمل حاجه ونكون ادها ونفسنا طويل علشان نكمل للنهايه يا مكنتش تتعمل من البدايه
ده حتى المتحدث الرسمى باسم الحكومه البريطانيه بذات نفسه قال انه شايف ان الثوره دى جت متأخر اوى وكان متوقع تحصل من زمان وقبل كدا بكتير
يعنى يمكن يا دوب احنا لحقنا نفسنا
ده انا اتحمق لابو الهول انما تقولى الريس
انا لما الاقى واحد بيغلط فى سياسة بلدى الفاسده ده انا لازم اشتم معاه علشان اكبر فى نظره ويعرف ان الشعب برئ من حكومته الفاسده
اللى يغلط فى الريس بيغلط فى رمز للفساد كان موجود فى مصر الشعب المصرى كله برئ منه
الريس ده مصر بريئه منه
هو وحكومته ببلطجيته عار على التاريخ المصرى

فى ايام الثوره كنت دخلت على موقع وابديت استغرابى من استاتس لناس بتدعى للريس ربنا معاك ياريس ربنا يقويك ربنا يثبتك وكاتبين لستة الانجازات العظيمه !
وبمنتهى الاستغراب سالت هى الناس دى بتدعى للريس ربنا يثبته على ايه بالظبط ؟
وكتبت ان دم الناس اللى ماتت وارواحهم متعلقه برقبته دا غير الخساره السنويه اللى تقدر بالمليارات بسبب تصدير الغاز لاسرائيل والخساره دى اكبر بكتير من المعونات اللى بناخدها من امريكا يعنى لو مكنش بيصدره بالخساره علشان يرضى اسرائيل مكناش هنحتاج للمعونات دى من امريكا وكان اقتصاد البلد هينتعش ومن المفروض اننا نكون من اغنى البلاد فى العالم لكن فى مصر اكتر من اربعين فى الميه من شعبه عايش تحت خط الفقر فى الوقت اللى هو فيه اغنى اغنياء العالم بثروته اللى جمعها من قلوب الناس الغلابه

والاستاذ اللى كاتب لستة انجازات الريس بتاعه على اساس انك بتكلم شعب كى جى تو مش اخد باله ان دا التطور الطبيعى للحاجه الساقعه ولا ايه ؟
الريس بتاعك مخترعش القمر الصناعى يعنى
طلع عليا واحد من بلطجية النت وسالنى سؤال
وانتى عملتى ايه علشان تتكلمى كده على ريس بلدك ؟
وبمنتهى الحماس رديت عليه
الاخ اللى بيسال وانتى عملتى ايه علشان تتكلمى كده على ريس بلدك ؟ اقولك انا عملت ايه وخلى نفسك طويل معايا شويه

اولا انا مخترعتش ابرع طرق التعذيب الانسانى على مستوى العالم ولا فتحت بلدى لباقى الدول علشان تجيب الناس اللى عايزه تظبطهم عندنا علشان اظبطهملها ولا دربت وفد خارجى على ايدى محترفين التعذيب اللى اتولدوا على ايديا وادتهم خبرتى العظيمه العبقريه والفريده من نوعها فى الوان التعذيب
ثانيا انا مقطعتش الطريق على غزه علشان الاكل والمعونات متوصلهمش لحسن اسرائيل تزعل مننا فى الوقت اللى هم بعتوا الاكل للجيش بتاعنا على الحدود فى ظل الظروف الراهنه !
ثالثا انا منشرتش كل انواع الفساد والتعتيم في اعلام فاسد ومفتحتش مصانع للخمرة عشان تكون صناعة محلية !
رابعا انا مصدرتش الغاز لاسرائيل بالخساره اللى حملتها على الشعب بتاعى عشان اسرائيل ترضى عنى
خامسا انا داينت الشعب بتاعى مديونيه انا كنت هبقى فى غنى عنها لو صدرت الغاز بالسعر العالمى او مصدرتوش اصلا
سادسا انا عمرى ما كنت ديكتاتوريه مستبده سابعا انا عمرى ما كنت مزوره ولا حكمت شعبى قهراً
ثامنا انا عمرى ما اتسترت على الحراميه والمرتشيين تاسعا انا معنديش ثروه مصدرها غير مشروع او مشكوك فيه
عاشرا وليس بآخر انا عمرى ما اصدرت قرار بقتل روح بريئه لمجرد انها بتطالب بحق من حقوقها وانا اللى سلبته بجبروتى وغفلتى
واحب اضيف حاجه اخيره اللى عنده نيه فى الاصلاح مش هقول كان صلح قبل ما حد يطالبه بده ولكن هقول على الاقل كان يبقى الرد هو اصدار قرارات جديده بالاصلاح والاستجابه الفوريه للمطالب مش محاولات للقمع اولا
وان مقدرتش افض المظاهرات ابتدى فى خطوات الاصلاح مجبرا بضغط من الشعب يعنى مفيش نيه ولا بتنجان
دى مجرد لعبه سياسيه جديده فى اولى خطوات الانتقام من الشعب
اخيرا احب اعترف لانى حقانيه اوى وعمرى ما كنت ناكره للجميل الحقيقه اللى انا مقدرتش اعمله دا كله الريس بتاعى قدر يعمله

ثم الناس اللى عايزه تخرج فى مسيرات لجمعة رد الجميل مصريين بجد دول ولا ايه ؟
عايشين معانا فى نفس البلد يعنى ولا فى القصر الملكى ؟
انا بقول نوزن الامور ونفهم ونشوف مين اللى يستحق يتردله الجميل
مش لسه ناس دمها مبردش ونقول عايزين نعمل مسيره للى شارك فى سفك دماؤهم بتشبسه الغريب فى كرسى الرئاسه والسلطه !
والناس اللى بتقول ان اى موظف عادى فى الدولة بيتكرم لما يوصل لنهاية الخدمه
معلش بس تعقيب صغير
مش كل الموظفين بيتكرموا
اللى بيخرج بفضيحه بيخرج راسه فى الارض والناس بتدعى عليه
والريس زيه زى اى موظف عادى فى الدوله
الرؤساء مش آلهه
ايا كانت الانجازات والمجهودات العبره بالنهايه والخواتيم
الانسان ممكن يعيش طول عمره انسان تقى عارف ربنا بيصلى بيصوم بيخرج الزكاه لكن العبره بالخواتيم
ومن مات على شئ بعث عليه
وبعدين انجازاته اتكرم عليها فى وقتها وخلصنا

كمان ملحوظه صغيره
الرئيس موصلش لنهاية الخدمه
الرئيس خرج قبل ما يكمل خدمته واللى كان فاضل عليها 7 شهور تقريبا
دلوقتى مفيش اى مبرر للتكريم

وبعدين اللى عاوز يدور على الحق فعلا
يبقى السؤال من الاول
هل الحاكم دا شرعى ؟
ومش شرعى بمعنى اسلامى
شرعى بمعنى هل الراجل دا جاى عن طريق شرعى يعنى صندوق انتخابات و بانتخابات نزييه وديمقراطيه
ولا جاى على دبابه ؟
ولا جاى بجينات وراثيه ؟؟
ولا جاى بصندوق انتخابات مزور ؟؟؟
اعتقد هناك فرق

للحياه عنوان

         مفيش فى الدنيا أكبر ولا أقدس من حق الحياه نفسه

" من اجل ذلك كتبنا على بنى اسرائيل انه من قتل نفسنا بغير نفس او فساد فى الارض فكأنما قتل الناس جميعا ومن احياها فكأنما احيا الناس جميعا "

صدق الله العظيم 

قتل اى انسان ان لم يكن قصاصا لـقـتـل انـسان آخر او لم يكن بسبب جريمة الافساد فى الارض فهو بمثابة قتل الجنس البشرى بـاجمعه وانقاذ اى انسان من الموت يعد بمثابة انقاذ الانسانية كلها من الفناء

" انما جزؤا الذين يحاربون اللّه ورسوله ويسعون فى الا رض فسادا أن يقتلوا أو يصلبوا أو تقطع أيـديـهم وأرجلهم من خلف أو ينفوا من الارض ذلك لهم خزى فى الدنيا ولهم فى الاخرة عذاب عظيم الا الذين تابوا من قبل أن تقدروا عليهم فاعلموا أن اللّه غفور رحيم " صدق الله العظيم

سـبـب نـزول هـاتين الايتين الكريمتين ان جماعة من المشركين قدموا الى النبى (ص) واعـلـنـوا اسـلامـهـم لكنهم لعدم تعودهم على طقس ومناخ المدينة اصيبوا ببعض الامراض فـنـصحهم النبى (ص) ان يذهبوا الى منطقة ذات مناخ جيد من الصحراء خارج المدينة كانت مرتعا لابـل الـزكاة واجاز لهم الانتفاع بلبن تلك الابل بما يكفيهم

ففعلوا وتعافوا مما كانوا يعانون منه من الامـراض لـكـنـهـم بـدل ان يقدموا الشكر على صنيع النبى (ص) معهم عمدوا الى قتل الرعاة الـمـسلمين والتمثيل بهم وسمل عيونهم ونهبوا ابل الزكاة وارتدوا عن الاسلام الى الشرك فامر النبى (ص) بالقاء القبض عليهم والقصاص منهم بمثل ما ارتكبوه بحق اولئك الرعاة الابرياء وجزاء لـهم على جرائمهم فسملت عيونهم وقطعت اوصالهم وقتلوا لكى يصبحوا عبرة لغيرهم فلا تسول لاحـد نفسه ان يرتكب مثل هذه الجرائم الوحشية البشعة وقد نزلت هاتان الايتان لكى تبين لنا حكم الاسلام فى هذه الجماعة

تبين الايه عقوبة من يشهر السلاح بوجه المسلمين وينهب اموالهم عن طريق التهديد بالقتل  وارتكاب العدوان ضد ارواح او اموال الناس باستخدام السلاح والتهديد به سواء كان هذا العدوان من قبل قطاع الطرق خارج المدن او داخلها واعتداء الاشرار على ارواح الناس واموالهم ونواميسهم

والـذي يـلـفـت الانـتباه في هذه الاية هو انها اعتبرت العدوان الممارس ضد البشر بمثابة اعلان الحرب وممارسة العدوان ضد اللّه ورسوله وهذه النقطة تبين بل تثبت مدى اهتمام الاسلام العظيم بحقوق البشر ورعاية امنهم وسلامتهم من قبل تشكيل لجنة حقوق الانسان ومن قبل ان يولد من هم يعتبرون انفسهم مصدر الامن والامان للمصريين !!

انا لله وانا اليه راجعون وقل لن يصيبنا الا ما كتب الله لنا

اللهم لا سهل الا ما جعلته سهلا وانت تجعل الحزن ان شئت سهلا
الله يرحم جميع امواتنا ويدخلهم فسيح جناته ولا حول ولا قوة إلا بالله العلى القدير 

كنت من فتره مش كبيره قريت تحليل عن تاريخ مصر بيتكلم عن انهيار مستقبلى متنبأ انو يحصل فى عام 2028 هكتبه فى الاول وبعدين هرجعلكو بتحليل اخر

         المخطط التاريخى لمصر

" ان تحليل مصر موجود فى تحليل الأمة العربية تحت المؤامرة النفطية لأن تفاعل مصر مع باقى الأمة العربية والإسلامية تفاعل حتمى وهى فى قلب أو وسط الأرض العربية والإسلامية 

ولكني آثرت أن أنظم لها مخطط تعاقب الأجيال منفصلا لأنها اقدم دولة عربية

 

1: بدأت مصر الحديثة عام 1805 بعد استقلال والى مصر العثمانى : محمد على الأرنأوطى عن الدولة العثمانية 

 

2: الانهيار الأول كان عام 1878 عند احتلال الإنجليز لمصر وهزيمة معركة التل الكبير وقيام ثورة عرابى عام 1881 رداً على الحالة المزرية ( الانهيار ) التى وصلت إليها مصر

 

3: الانهيار الثانى كان عام 1952 قامت ثورة يوليو بقيادة جمال عبد الناصر فطردت الملك الطفيلى فاروق آخر سلالة محمد على الذى كان ألعوبة بيد الغزاة الإنجليز وكان أن سبق الانهيار ( بوادر الانهيار ) هزيمة  فلسطين وحريق القاهرة الكبير

 

4: مصر الآن فى منتصف الجيل الطفيلى الثالث أى بداية مرحلة الشيخوخة وسوف يكون انهيارها المتوقع عام 2028

 

5: إن مصر مشمولة بالمؤامرة النفطية فهى تتعرض لضغوط خارجية شديدة وهى غير مستقلة بقرارها فلذلك قد يختلف انهيارها عما هو مكتوب بالمخطط  أى أن الانهيار قد يبكر عما هو مكتوب ولكن بالقطع إن الانهيار سوف لن يتأخر عن ما هو مكتوب "

انتهى.

افتكرت المخطط التاريخى لمصر دا فى الوقت دا تحديدا بمناسبة الاحداث الجاريه على ارض الواقع

مش عارفه الاحداث الجاريه منذ 25 يناير 2011 مرورا بجمعة الغضب وحتى جمعة الرحيل هو الانهيار المشار اليه بالفعل والى اى مدى سوف يسفر عن نتائج وهل ستكون نتائجه سلبيه ام ايجابيه بالنسبه لمصر والوطن العربى باكمله وحتى جميع الدول الاوروبيه !

حريق القاهره 1952

أجمعت المصادر الرسمية وشهود العيان على أن الحادث كان مدبرًا وأن المجموعات التى قامت بتنفيذه كانت على مستوى عالٍ من التدريب والمهارة فقد اتضح أنهم كانوا على معرفة جيدة بأسرع الوسائل لإشعال الحرائق وأنهم كانوا على درجة عالية من الدقة والسرعة فى تنفيذ العمليات التى كلفوا بها كما كانوا يحملون معهم أدوات لفتح الأبواب المغلقة ومواقد إستيلين لصهر الحواجز الصلبة على النوافذ والأبواب وقد استخدموا نحو 30 سيارة لتنفيذ عملياتهم فى وقت قياسى كما أن اختيار التوقيت فى الفترة ما بين الساعة الثانية عشرة والنصف ظهرًا والساعة الحادية عشرة مساءً يعد دليلاً آخر على مدى دقة التنظيم والتخطيط لتلك العمليات فقد اختارت هذه العناصر بعد ظهر يوم السبت حيث تكون المكاتب والمحلات الكبرى مغلقة بمناسبة عطلة نهاية الأسبوع وتكون دور السينما مغلقة بعد الحفلة الصباحية

وفي نفس ليلة الحريق قدم رئيس الوزارة النحاس باشا استقالته ولكن الملك رفضها واجتمع مجلس الوزراء وقرر مواجهة الموقف بإعلان الأحكام العرفية فى جميع أنحاء البلاد ووقف الدراسة فى المدارس والجامعات إلى أجل غير مسمى

وتم تعيين النحاس باشا حاكمًا عسكريًا عامًا فى نفس الليلة فأصدر قرارًا بمنع التجول فى القاهرة والجيزة من السادسة مساءً حتى السادسة صباحًا وأصدر أمرًا عسكريًا بمنع التجمهر واعتبار كل تجمع مؤلف من خمسة أشخاص أو أكثر مهددًا للسلم والنظام العام يعاقب من يشترك فيه بالحبس

هل هى مفارقات التاريخ والزمن الذى يعيد نفسه ؟
الفارق الوحيد هو ان التاريخ فى هذه المره يكتب امام أعيننا !

نكران الجميل

حابه اوصل وجهة نظرى بخصوص النقطه دى تحديدا انا بشوف ان الانسان قد يكون ناجح فى موقع ما ولكنه فاشل فى موقع أخر فقد تكون طبيبا ناجح ولكنك سياسيا فاشل

فى أحد الحروب التى خاضتها بريطانيا انتصرت فيها بفضل قائدها وبعد الانتصار كانت انتخابات الرئاسه ولم تختاره بريطانيا للرئاسه على الرغم من انه الذى انتصر لها ولم يقل هذا نكران للجميل وانا الذى حاربت وانتصرت لكم ويجب ان امسك الحكم فالامر ليس كذلك

قرار التنحى ليس بالامر العصيب

كل المسئولين فى دول العالم " المتقدم " يقدمون استقالاتهم عند الشعور بالعجز " او القصور " فى تأدية واجبهم نحو مسئولياتهم .. إلا فى العالم العربى !

والغريب أن الحكام العرب " فقط " هم الذين سيحاسبهم الله على هذا الكرسى لانه ليس بعد الكفر ذنب

أما عن قرار تنحى الزعيم جمال عبد الناصر عن اى منصب رسمى وأى دور سياسى وعودته الى صفوف الجماهير بعد هزيمة يونيو فأقول للذين يشككون بأنها قد تكون " لعبة سياسية" :
أيها الساده ولو فرضنا انها لعبة فكل زعماء العرب حاليا أحرف وأمهر بكثير فى اللعب منه فلماذا لا يلعبون؟
الرئيس الراحل جمال عبد الناصر قرر ان يتنحى اعترافا منه بمسئوليته عن احداث النكسه وما ترتب عليها من كارثه وعندما طالبه الشعب بالبقاء قال فى بيانه الثانى " إننى سوف أبقى حتى تنتهى الفترة التى نتمكن فيها جميعا من أن نزيل آثار العدوان . إن الأمر كله بعد هذه الفترة ، يجب الرجوع فيه إلى الشعب فى استفتاء عام . إنى مقتنع بالأسباب التى بنيت عليها قرارى وفى نفس الوقت فأن صوت الشعب بالنسبة لى أمر لا يرد ولهذا فإن القرار مؤجل" وكانت منه بداية للتخطيط المحكم للانتصار الذى عقبه فيما بعد فالشعب هو من اراد ابقاؤه وهو من طالبه بذلك وهو من بقى من اجله ومن أجله فقط وقال ان صوته بالنسبه له امر لا يرد
فالاعتراف بالخطأ وفتح صفحة جديده هى بداية الاصلاح وليس قبل الاعتراف بدايه فما بنى على باطل فهو باطل !
الاعتراف بالاخطاء امر مقبول جدا وخصوصا عند شعوب تغلب عندها العاطفه وقرارات مثل هذه ترفع من قدر صاحبها وليست تنقص منه فى شئ

التاريخ كما يجب ان يكون

التاريخ السياسى هو السرد والتحليل للأحداث السياسية والأفكار والحركات والقادة السياسيين وغالبا ما يتناول التاريخ السياسى تاريخ تشكل وتطور دولة وأمة ونهايات وبدايات فكيف يمكن للتاريخ الوطنى على امتداد ثلاثون عاماً وأكثر ومن أخطر أعوام التاريخ الحديث لهذا الوطن أن يكون ملكاً لشخص واحد يأخذ منه ما يشاء ويحذف منه ما يشاء ويُعدِّل فيه ويرسمه بل ويركب احداثه وصوره حسب مزاجه وأيديولوجيته

هل يكتب لنا التاريخ سيناريوهات خياليه ؟ وهل يُكتَب التاريخ ويدون من على أرض الواقع الحقيقى مهما كان مراً وفاضحاً لاشخاص معنيين ام من وسائل نشر اعلاميه مرئيه كانت او صوتيه مزيفه !

اذا كان ما يهم هو التاريخ فهو يُكتًب من قلب الحدث وإن كان الأمر كذلك فلما الشائعات والتذييف والتزوير فى سرد وتحليل المواقف والاحداث فى زمن الحدث ؟ لماذا نضحك على أنفسنا فقط ؟ ولماذا لا نفعل ما يجب علينا فعله وما يشهد لنا به التاريخ وليس علينا ؟