حب احمد ومنى

عمره ربع ساعه وفاضل عليه كمان ربع ساعه
الله يرحم زمن الربع قرن وميت عام
واهلا بزمن الجفاف والفتور والعلاقات البارده الزائفه واليوم الواحد !
احنا بقينا عاملين زى الناس اللى بتتصور مش بتعيش
حياتنا كلها بقت صور
الحب بقى عامل زى صور الايمو
صوره من غير احساس
تماثيل متجسده فى صورة بنى ادمين مفيهاش روح ولا حياه
حاجه كده عامله زى الصور المتركبه على كلام غير اللى فى النسخه الاصليه
وتبقى حاسس ان الكلام مش ماشى مع الصوره !
ونبقى عاملين زى اللى اخترع الكدبه وصدق نفسه !
اوهمت الناس انك بتحب وانكو متقدروش تستغنوا عن بعض وانهم هيسمعوا خبر حلو قريب
واوهمت الطرف التانى انك بتحبه واوهمت نفسك انو هو كمان بيحبك وانك اخيرا لقيت نصك التانى اللى بتدور عليه من زمان وتبدأوا تعيشوا الدور
وفجأه خلص المسلسل..

مش ممكن تكون ظروف الحياه هى السبب
فيه شباب معدم تحت خط الفقر زى ما بيقولوا لكن عنده مبدأ ولا يمكن يخدع بنت بحب زائف او على الاقل مش هيدخل فى علاقه مش محسوبلها
يمكن تكون الظروف سبب فى تأخر سن الجواز سواء للولد او البنت
لكن عمرها ما تكون سبب فى جفاف المشاعر وتعدد العلاقات

الحب مش كلمه حلوه تتقال ولا تتكتب على جدران
الحب عامل زى الزرعه اللى محتاجه رعايه خاصه علشان تكبر
حتى لو زرعناها فى تربه خصبه وبيئه مناسبه هتموت بس لو انت اتجاهلتها او قررت تموتها
ازاى تختار نبته وتزرعها وترعاها وتكبرها وبعدين تولع فيها
ازاى قدرت فـ يوم توهم انسان انك حبيته وانت اختارت لحبكم نهايه قبل ما حتى تبتدوا
ازاى تحس باللهفه والشوق لانسان مبتحبوش
وازاى تخاف عليه من قلبك وهو مش فارق معاك
وازاى تقوله وحشتنى وانت حتى مش قادر تبص فـ وشه
بتغلس على نفسك مثلا ؟!
وازاى هتنسى كل ده ؟!

احمد نموذج للشاب اللى عايز يخلع ومنى البنت اللى مش فارق معاها على طريقة قالى الوداع قلتله قشطه!
لما وصلوا للمرحله دى اتكلموا واتفاهموا واتفقوا انهم مش هيكملوا
ورحل احمد وفارقت منى
لا دمعه نزلت ولا قلب انجرح
وعشان احمد راجل مش مان هيحب تانى وتالت
ولان منى بتعمل اللى فى دماغها هتحب او تستنى العريس
لا قلب انكسر ولا عين بكت
ولا مستقبل بينهار
دا غير الحب اللى بينتهى من غير كلمه
يمكن مش بيحبوا لحظات الوداع
ساعات الوداع بيكون قاسى فعلا
بس لانه احساس لحظى وهم عارفين كده بيكونوا مطمنين انها مسألة وقت وعندهم تفاؤل مجهول المصدر ان اللى جاى هيكون احسن
وهيقنعوا نفسهم ان الدنيا زى ما جمعتهم من غير سبب فرقتهم من غير اسباب لانها مسألة نصيب
ولما تسال احمد ومنى سبتوا بعض ليه تلاقيهم مش عارفين او مش عايزين يقولوا لانهم يمكن عايزين يغيروا بس !
وينتهى الحب اللى مقدرتش الجدران ولا ظروف الحياه تتحداه بأقل من البساطه رغم انه ملوش سبب واضح
حاساها صعبه شويه
لأ اوى
دا الواحد لما بيتفرج على فيلم عربى مدته ساعه الا ربع عينه بتبكى على لحظة فراق
حتى لو عارف ان النهايه هيرجع الحبيبين لبعض
للدرجه دى المشاعر والاحاسيس اتجمدت ؟
الولد متفرقش معاه فلانه من علانه
والبنت اهو اى شاب وخلاص
حلو انك متبصش وراك بس مش حلو انك متبصش ادامك
لانك من غير ما تحس بتعمل لنفسك ماضى مش ذكرى
وياريته ماضى مؤثر
لو كل شاب وبنت سال نفسه كام مره حب او عمل علاقات فى حياته واد ايه منهم ساب أثر فى نفسه
النتيجه مش هتكون فى صالحه
ولو فضلت ماشى بالوضع ده تأكد انك هتقع
بس المصيبه لو الوقعه موجعتش...

احمد كان بيمنى نفسه انه مش ممكن يتجوز واحده حبت قبله قبل كده
وساب منى لانه مش واثق فيها
مع ان العروسه اللى جابتها ماما كانت بتحب واحد تانى سابها لنفس السبب
وطبعا احمد مش هيعرف شئ عن ماضيها المجهول بالنسبه لاى حد غيرها
مع ان كان معاه اللى مكنتش بتحب غيره
لو كل واحد حب واحده اخلص النيه فى الارتباط بيها وهى كمان اخلصت ليه كان كل شاب اتجوز اللى محبتش غيره فعلا
او على الاقل ميدخلش فى علاقه معاها غير بشكل رسمى علشان يكون مطمنلها
وبلاش الاختبارات الفاكس دى لانها طبيعى تفشل دا غير انها غير منصفه اساسا
لكن تجمد مشاعر الشباب والحال اللى وصلوله من عدم التفكير فى لحظة الفراق والاستهتار بيها سهل الدخول فى علاقات مش محسوبه من البدايه
مفيش حد بيفكر الطرف التانى بيحبه بجد ولا لا
اى شاب يشوف بنت حلوه او مش حلوه يقولها معجب تقوله اوك
هم مش فاهمين دا معناه ايه
ليه محدش بيفكر وليه محدش بيهمه يحس الحب بجد
اى واحد وواحده فى الدنيا بقى كل همهم يكون فيه طرف تانى فى حياته وبس
غالبا للتباهى ادام اصحابه
البنت بقت تحكى لاصحابها عن الحبيب رقم 36 عادى جدا ولا كأنه شئ تخجل منه
وتلاقى الحب ده عمره مكملش 3 ايام بس هى عملته حكايه وسمتها حب
مع انى سمعت زمان كان عيب البنت تشرب قهوه ادام حد

اصلا مفاهيم الحياه كلها اتغيرت
اللى كان عيب بقى عادى واكتر من كده
مش مستغربه من كل ده اد استغرابى من التغيير اللى حاصل فى المشاعر والاحاسيس كمان
الحب اللى بجد مبينتهيش عند حد معين
كان زمان احمد ومنى يعجزوا ووشهم يكرمش وهم لسه بيحبوا بعض وباقيين ع العهد
لكن الفتور اللى حاصل والملل من العلاقه سببه انه اصلا مكنش حب

المصيبه لما يكون احد الطرفين برئ فى مشاعره ونيته يكمل مشوار حياته اللى جاى كله مع حبيبه
هتقولى محدش بيضرب حد على ايده
صح معاك حق دا حقيقى
بس الحب بيجبرنا على حاجات ممكن نبقى شايفينها مش فى صالحنا
وانت دخلتله من نقطة ضعف عنده وهى حبه ليك
صدقنى متحاولش ترضى ضميرك انت اصبحت جانى
الاستهتار بمشاعر الناس شئ بشع
لأ ابشع شئ فى الوجود
الواحد مش قادر يتخيل قصة حب وارتباط اكتر من سنتين او حتى سنه وتنتهى بأقل من البساطه
دا العشره متهونش الا على ولاد الحرام
طب حتى شوية زعل ع الماشى كده واهو كدا كدا مفيش حاجه دايمه
انما من تانى يوم تبقى مع حد تانى
للدرجه دى الاحساس بالناس انعدم ؟!
لأ وتانى يوم ليه دا فيه واحد بيحب اتنين وتلاته ويمكن اكتر
وتلاقى البنت عارفه بس مش فارقه معاها
المهم انه معاها دلوقتى
ما هى عارفه انه كدا كدا الحكايه مش هتكمل

اثار انتباهى تقرير شوفته فى التليفزيون اتعمل مع بداية السنه الجديده وكان السؤال كالاتى
ايه احلى حاجه حصلتلك السنه اللى فاتت ؟
كل الولاد اللى جابوهم كانت اجابتهم كالتالى
انى فسخت خطوبتى !!
والبنـــات :
انى فركشت !!
احساس بالسعاده فظيع يغمر كلا الطرفين وهو بيقولها
بجد فرحتلهم من قلبى
يلا كل حب وهم طيبين
قصدى هابى نيو يير ...